Isa sa pinakamalapit sa tao na hayop ay ang aso, tinatawag nga silang man’s bestfriend. Hindi lamang dahil taga bantay sila sa bahay at tumatahol kapag may ibang tao, bagkus naging kaaliwan din sila at pantanggal stress sa kanilang mga amo.
You May Also Read:
Kawawang Magkakapatid,Tinitiis Kainin ang Toyo, Niyog at Asin Matapos Maulila sa mga Magulang.
Isang balita kamakailan ang nagbigay ngiti sa mga netizen kung saan ang isang lurcher dog sa United Kingdom ay pinakonsulta ng kanyang amo sa paniniwalang may pilay ito dahil sa paika-ika niyang paglalakad.
Ito ay ibinahagi ni Russell Jones noong January 16, 2021 sa Lurcher Link Rescue chat, isang public group sa Facebook, ang video niya kasama ang alagang asong si Billy. Nakabenda ang kanang paa ni Russell at gumagamit siya ng saklay habang lumalakad.
Makikita naman si Billy na nakataas ang isang paa at paika-ika rin kung lumakad kagaya ng kanyang amo.
Sa panayam sa kanya ng isang morning show sa UK, sinabi ni Russelln na gumagamit siya ng saklay dahil sa sprained ankle nang mahulog siya.
Aniya, kapag naglalakad siya sa labas kasama ang alagang si Billy ay napapansin niyang paika-ika ito kung lumakad kaya dinala niya ito sa beterinaryo para masuri at mabigyan agad ng lunas. Gumastos daw siya ng £300 o katumbas ng halos P20,000 para sa vet fees, x-ray at gamot sa kirot para sa paa ni Billy.
Sinabi ng beterinaryo na wala siyang makitang anumang diperensya sa paa ng aso at inamin kay Russel na wala na siyang magagawa para kay Billy.
May nabuong hinala ang asawa ni Russell na si Michelle nang isang araw ay nakita niyang normal na tumatakbo sa hardin si Billy habang wala si Russell.
Sinubukan ni Russell na igala si Billy upang mapatunayan ang hinala ni Michelle na wala itong iniinda sa paa. Sa halip na maglakad ay sumakay siya sa motorsiklo habang ang aso ay naglakad. Normal ang lakad ni Billy.
Doon niya nalaman na paika-ika lang lumakad ang alaga kapag paika-ika rin siyang lumalakad.
Aniya, “Cost me £300 in vet fees and X-rays, nothing wrong just sympathy. Love him.”
Nasayang man ang nagastos ni Russell, napatunayan niya namang mahal siya ng kanyang alaga at ito ay nagpasaya ng lubusan sa kanya.
0 comments :
Post a Comment